第一日開始做呢個Web site係2000年12月2日,o個日將我百幾隻牛拎晒出o黎影相,影完又要執番入去,搞左成日!(特別鳴謝劉賤人先生幫我手影相)到而家正式出街,有成半年有多!點解要搞咁耐?嘩大佬,要逐隻牛整喎,仲要畫圖喎,成個Site全部圖都係我自己畫o架!對於冇乜藝術天份o既我o黎講真係幾難o架!而家畫出o黎o既效果,我已經滿意到嘔o架喇!

其實點解會諗到做呢個Site o既呢?因為呢,咁多牛放晒o係屋企,但只得我一個人睇到,實在係唔過引,所以好想放佢地上o黎俾大家睇下,亦都藉此激發你地送更多o既牛俾我!呵~~~~

點解我咁變態會買咁多牛o既呢?因為我叫亞牛囉!最初其實唔鍾意人地叫我亞牛o架,但人地叫下叫下叫慣左咁我都冇計啦!(我其實好憎人問我點解叫亞牛,因為個原因係好唔特別,你聽完都唔會覺得有咩新奇刺激,所以我好唔鍾意答!你由得我罷啦,總之係叫亞牛啦,你咪理點解啦!)跟住D人就開始送牛野俾我o勒,我開頭都係唔鍾意o架,因為覺得牛都唔可愛o既,但當我有越o黎越多o既時候,就好自然咁鍾意左佢o勒!其實之前我好少買牛,因為讀書時冇乜錢,到而家先至會買多少少!如果你真係睇晒牛展裡面o既所有牛o既話,你會發覺其實大部份o既牛都係人地送o既,所以呢,繼續呀你地!知唔知呀?!呵~~~ 另外,我每逢有朋友去外地我都會托佢地幫我買牛,我通常會俾個Budget佢地,當佢地見到D好得意又特別o既牛就會幫我買,所以我可以擁有來自世界各地o既牛,真係唔該晒你地!下次出門記得話聲我知先!

我一路有新牛都會繼續放上去o架,不過我知你地睇完一次之後應該都唔多會o黎睇第二次o架喇,所以我盡量會諗多D野加上o黎,要o黎留住你地個心!呵~~~ 其實我一開始已經諗好左要整一段flash opening o架喇,但要畫好多圖,又好似好複雜咁,所以我都係未整住,遲D整左你地一定要o黎睇o架喎!

你地o係個Site度如果見到有咩死Link死圖或者有任何error記得話我知喇,Email俾我啦,成隻牛郵o係左手邊個Menu度呀!

見到呢幾隻野唔洗驚!開頭係想畫一隻牛o係度跳舞,但畫極都畫得唔靚,開頭畫左第一隻,但有專業人仕話佢好似風濕同頭痛,有唔專業人仕話佢爭條毛巾就似o係度擦緊背,於是畫左第四隻出o黎,跟住又有人話佢郁得唔靚,於是畫左第二隻出o黎,但又有人話佢扭得唔夠勁,咪畫到佢扭得勁D囉,於是畫左第三隻出o黎,又話佢扭得太勁,最後都係決定唔鬼畫喇,諗左好耐都唔知放邊隻o係度好,諗諗下,畫左唔用又好徙,於是咪放晒出o黎囉!呵~~~